Wis suwe aku pengen nulis babakan siji iki. Yaiku babakan onthel. Dudu soal aku bar tuku onthel anyar, tapi soal apa sing tak sawang saben isuk, yoiku akeh wong podo ngonthel. Mulai cah cilik sampe wong gede podo kabeh: ngonthel. Sakbenere enek opo?
Suworo no tipi ngandani yen kahanan ngunu kuwi perkoro enek virus corona. Dadi wong-wong pengen sehat ben gak kenek virus. Koran ngabarne yen bakul onthel nang ndi-ndi kelarisan.
Aku banjur kelingan jaman semono, naliko isih cilik, ngonthel karo bayangne numpak motor. Cangkem sing ngang-ngeng nirokno suworo mesin motor. Sak konco muter-muter deso. Ati bungah ra kaprah. Padahal, onthele kuwi ora ono selebor utowo rem. Yo ibarate mung enek roda loro tok. Sing penting ngglinding.
Pas budal sekolah yo ngunu, ngonthel ngambyang no dalan. Soale dalan isih sepi montor. Ngonthel nang dalan aspal senenge ra kaprah. Sing aku kelingan tenanan yo nek pas ngonthel riyayan nang omahe guru-guru opo konco-konco. Dalane embet ra karuan. Ban onthel gebul linet. Kadang kudu dituntun utowo dipikul. Rame banget. Podo ngguyu cekikikan. Awak kesel kabeh tapi ati bungah. Due onthel mini wes bungah. Opo maneh nek due sepeda balap sing bane cilik tur setir melungker. Jian bungah tenanan.
Tapi jaman wes bedo. Sakiki jaman corona. Onthel regone jutaan. Onthel mini opo Jengki wes ketinggalan jaman. Onthel lipat, fiksi, lan mbuh opo maneh jenenge. Nek ngonthel Gawe kaos olahraga, nganggo sepatu, topinan, kocomotonan. Nek pegel leren terus pota-poto. Selfi jare istilah kerene. Nek gak percoyo jajal sawang nek isuk, wong2 podo ngonthel nganggo klambi apik-apik.
Biyen wong ngonthel perkoro gak due motor. Tapi sakiki wong ngonthel ora perkoro kuwi neh. Tapi pengen sehat, pengen selfi, pengen kumpul-kumpul karo konco lan tonggo. Ngonthel wes dadi gaya hidup.
Sakiki nek isuk enek wong ngonthel kok onthel e uapik, berarti wong kuwi mung jalan-jalan. Tapi nek wong ngonthel kok onthele elek, iso dibade yen wong kuwi arep nang sawah opo nang pasar. Status sosiale wong iso didelok soko onthel e. Onthel sing ditumpaki yo iso nunjukno tujuane wong.
Jan-Jane ngonthel sing lagi ngetren iki dadi kebiasaan apik. Awak dadi seger, ora mung nang omah tok sing iso marai sumpek ati sumpek pikir. Sing disawang mung srawang. Tapi nek ngonthel yo kudu tetep eleng tujuan awale. Ojo mung pota-poto tok. (Tapi nek dipikir-pikir, aku iki sakjane kurang gawe komentar babakan ngene ya. Eh yo ben).
Iso wae, babakan ngonthel iki nunjukno yen opo-opo nang sekitare awak dewe iki wes owah soko asline. Owah soko tujuan sejatine. Koyo tujuane wong urip sing sejatine gae persiapan akhirat, tapi nyata ne luwih milih dunya ketimbang akhirat. Mestine karo-karone ne yo mlaku. Nek nyawang wong ngonthel kito kudune mulai mikir soal opo-opo sing dadi tujuan awal kanggo sekabehane perkoro.
